Klosi dhe Marksistët e ÇK-së

Aktualizuar më: Kjo faqe është vizituar:

Klosi dhe marksistët e UÇK-së nisin gjuetinë e shtrigave ndaj nacionalistëve dhe antikomunistëve nga Kosova

Arrestohen pse nuk nderojnë me grusht Në mbështetje të këtij agresioni të egër është vënë plotësisht edhe Televizioni Shtetëror

Njerëzit e Fatos Klosit dhe krahut marksist të UÇK-së kanë filluar gjuetinë e shtrigave në Shqipëri ndaj të rinjve kosovarë nacionalistë dhe antikomunistë. Janë me dhjetëra kosovarë të ndaluar nga repartet e përziera të SHIK-ut dhe të marksistëve të Kosovës që janë arrestuar dhe keqtrajtuar, vetëm se nuk kanë pranuar të nderojnë me grusht, simboli i qeverisë së re të Hashim Thaçit. Janë të shumtë ata të rinj kosovarë që kanë mbërritur këto ditë në Shqipëri duke ardhur nga perëndimi, dhe në vend që të gjejnë terrenin e pritshëm për t’i shërbyer vendit të tyre, gjejnë kaçakët e Fatos Klosit dhe të Xhavit Halitit. Është vërtetë e tmerrshme të përfundosh në qeli vetëm për shkak se nuk je marksist si ”qeveritarët” e Rognerit, që pretendojnë se po mbrojnë Kosovën nga Tirana, dhe as komunist si Rexhep Meidani, Fatos Klosi apo Skënder Gjinushi, që po kërkojnë pushtet edhe në Kosovë, duke investuar për dinosaurët e atjeshëm. Në këtë aferë të pështirë është përfshirë tashmë prej shumë kohësh edhe televizioni shtetëror, i kthyer totalisht në megafon të komunistëve të Kosovës dhe të Shqipërisë, i cili i ka mbyllur ekranin çdo faktori tjetër jokomunist të shqiptarëve në të dy anët e kufirit. Dhe sikur të mos mjaftonte kjo, ai i ka kallur krupën shqiptarëve dhe perëndimit, duke dhënë pamje të montuara me të rinj kosovarë që në sallat e Evropës nderonin me grusht, duke premtuar se po shkonin të luftonin në Kosovë. Këta spekullantë të paskrupuj janë sulur mbi nacionalistët dhe mbi antikomunistët për t’idetyruar ata që të pranojnë linjat e tyre ideologjike, të cilat ende bien erë kërmë. Duke u mbështetur në falangat marksiste të Kosovës dhe duke i përdorur mjetet represive për të përçarë shqiptarët dhe goditur nacionalistët, qeveria shqiptare po bën më të keqen ndaj problemit kombëtar. Pandeli Majko nuk ka pse bën të paditurin, kur nën hundën e tij ndodhin të gjitha këto poshtërsi. Ai ose duhet të shkarkojë Fatos Klosin, ose duhet të pranojë se është bashkautor me të në goditjen e kosovarëve nacionalistë dhe antikomunistë, vetëm pse nuk i nënshtrohen orekseve për pushtet të të babëziturve marksistë. Kjo nismë mizore, në kohën që Kosova po digjet dhe shkrumbohet, është shërbimi më i mirë që mund t’i bëhet Milosheviçit dhe regjimit kriminal të Beogradit. Këta gogolë që mendojnë se u ka ardhur koha që të shkelin mbi shqiptarët pasi të mbarojë lufta, po japin mesazhe alarmante për perëndimin, i cili është angazhuar seriozisht për të zgjidhur drejt të ardhmen e Kosovës. Sepse askush nuk mendon në Evropë dhe në SHBA, se bota demokratike po shpenzon kaq shumë para dhe energji njerëzore kundër Milosheviçit, që nga e gjithë kjo betejë të dalin të fituar një grup marksistësh, pikërisht në kohën që gogoli i komunizmit ende tremb fëmijët në gjumë.
(S.L.)