Konferencë shtypi e zëdhënëses së LDK-së, zonjës Donika Gërvallës

Konferencë shtypi e Znj. Donika Gërvalla, Zëdhënëse e LDK-së në Gjermani

Donika_Gervalla.jpg (42076 Byte) Bonn, 25 qershor (QIK) - Sot, në orën 10:00, në Bundespressehaus, në Bonn, Zëdhënësja e Degës së LDK-së në Gjermani, Zonja Donika Gërvalla, mbajti një konferencë shtypi. Temë e kësaj konference shtypi ishin përshtypjet e Zonjës Gërvalla nga vizita e këtyre ditëve në Kosovë, si dhe hapat urgjentë që duhen ndërmarrë për ndërtimin e shoqërisë civile në Kosovë.

Në prezencën e gazetarëve të shumtë gjermanë dhe të akredituarve nga vendet e tjera në Gjermani, Zonja Gërvalla e hapi konferencën e shtypit me fjalët: Kam marrë pjesë si anëtare e delegacionit të Lidhjes Demokratike të Kosovës (LDK) në një udhëtim nëpër Kosovë të organizuar nga KFOR-i. Në fillim të kësaj jave jam kthyer. Kosova është për herë të parë e lirë nga mekanizmat e represionit të Beogradit. Ndjehemi të çliruar dhe ne e shohim NATO-n si organizatë e cila na ka çliruar.

Më tutje, duke folur për strukturën komanduese të KFOR-it, Zonja Gërvalla u shpreh se udhëheqja e NATO-s në kuadër të KFOR-it është për ne e pashmangshme dhe kjo vlen sidomos për kontingjentin rus, i cili është shkas për brengosje, duke shtuar se sipas informatave më të reja nga Ministria Amerikane e Mbrojtjes, okupimi i aeroportit ishte një aksion i parapërgatitur për një kohë të gjatë dhe një goditje e përgatitur nga pikat më të larta të Moskës. Në këtë kontekst, shtoi ajo na vjen keq që udhëheqja e Rusisë ka rënë në një aventurë të këtillë dhe, përveç kësaj, thjesht ka gënjyer bashkësinë ndërkombëtare rreth këtij aksioni.

Pas këtyre vlerësimeve mbi rolin e NATO-s në çlirimin e Kosovës, nga njëra anë dhe, mbi rolin destruktiv rus në procesin e vendosjes së trupave paqeruajtëse të KFOR-it në Kosovë, Zonja Gërvalla paraqiti përshtypjet e saj nga vizita e këtyre ditëve në Kosovë.

Para së gjithash, theksoi ajo, atij që viziton Kosovën i imponohet përshtypja se popullsia e Kosovës është e entuziazmuar dhe mirënjohëse për ndërhyrjen e NATO-s në Kosovë. Por, krahas kësaj, theksoi ajo, nuk kanë se si të mos bëjnë përshtypje, qysh në rrugën nga Prishtina, shkatërrimet e pabesueshme, të cilat makineria ushtarake serbe i ka shkaktuar në fushatën e saj gjenocidale kundër një populli të tërë. Krejt në kontrast me këto pamje të tmerrshme është vullneti i pathyeshëm i kosovarëve për t´u kthyer sa më parë në atdheun e tyre. Qindra mijëra njerëz janë në kthim e sipër, pasi që NATO ia arriti qëllimit të saj që të krijojë kushtet e sigurta për kthim.

Duke folur për shkatërrimet e shumta nga falanga serbe, Zëdhënësja e LDK-së, Donika Gërvalla, tha: Gjatë tërheqjes së tyre, njësitë ushtarako-policore serbe kanë ushtruar një politikë të tokës së djegur. Është plaçkitur gjithçka me vlerë. Ato që kanë mbetur janë djegur nga ushtarët, paramilitarët dhe rrënuesit e tjerë duke u tërhequr. Ky është akt, i cili, pas gjithë ngjarjeve të mëparshme, edhe njëherë dokumenton veprimin barbar të cilit i ishte nënshtruar një popull i tërë. Më lejoni që të paraqes para jush shembullin e Podujevës: përderisa trupat britanike të KFOR-it shkonin përpara, trupat serbe kanë djegur ato pak shtëpi të mbetura të padëmtuara në intervalin kohor mes arritjes së KFOR-it dhe largimit të trupave serbe.

Më tutje, duke folur për procesin e rindërtimit të Kosovës, Zonja Gërvalla tha se Kosovës i duhet tani çdo burrë dhe çdo grua, prandaj kërkojmë urgjentisht nga qytetarët e kualifikuar të Kosovës jashtë shtetit, e veçanërisht këtu në Gjermani, që të mendojnë çdo mundësi se si të mund të marrin pjesë në rindërtimin e vendit tonë. Në këtë kontekst, ajo tha se shumë nga kosovarët jashtë vendit duhet të kthehen në shtëpi, duke shtuar se ne, natyrisht, përshëndesim çdo ndihmë, ajo na duhet urgjentisht, ajo është esenciale për njerëzit dhe, në këtë drejtim, na duhen urgjentisht ekspertë ndërkombëtarë. Por, para se në Kosovë të vijnë legjionet e teknokratëve të shtrenjtë, duhet të shfrytëzohen njohuria e kosovarëve dhe njohja e vendlindjes së tyre, për të realizuar rindërtimin e vendit. Përmes kësaj, njerëzit në Kosovë munden të punësohen. Kështu do të hapet perspektiva e, përveç kësaj, krejt kjo mund të realizohet me një çmim shumë më të lirë se sa niveli i rrogave të Evropës Qendrore. Donika_Gervalla1.jpg (42728 Byte)

Pastaj, Zonja Gërvalla paraqiti qëndrimet e saj mbi ndërtimin e shoqërisë civile në Kosovë. Në këtë kontekst, ajo tha se UÇK-ja, sipas premtimeve të dhëna Sekretarit të Përgjithshëm të NATO-s, Javier Solana, do ti dorëzojë armët brenda një afati tashmë të caktuar. Ne përshëndesim këtë hap të rëndësishëm drejt jetës civile, i cili u arrit me vullnetin e fortë të NATO-s, tha ajo, duke shtuar se ne, gjithashtu, përkrahim strategjinë e KFOR-it që të veprohet rreptësisht kundër secilit që plaçkit, djeg shtëpi dhe përndjek banorë të pafajshëm të Kosovës. Ne gjithmonë jemi shprehur për një Kosovë demokratike dhe të hapur dhe kjo vlen posaçërisht tani.

Duke folur për rolin e pakicës serbe në Kosovë, Zonja Gërvalla theksoi se ne e dijmë shumë mirë, nga njerëzit në vend, se vepra të tmerrshme mizore nuk ka patur vetëm nga trupat dhe paramilitarët. Fatkeqësisht, në kuadër të kësaj barbarie, edhe shumë banorë serbë të Kosovës kanë marrë pjesë në këto aksione ose kanë torturuar fqinjtë, ua kanë plaçkitur pasurinë ose ua kanë shkatërruar shtëpitë. Por, ka nënvizuar ajo, LDK-ja, si një faktor i rëndësishëm politik i Kosovës, dëshiron që banorët serbë të Kosovës të cilët nuk janë implikuar në këto akte të kthehen në vendbanimet e tyre. Mbrojtja e KFOR-it duhet të vlejë edhe për ata.

Në lidhje me hapat e ngutshëm që duhen ndërmarrë për ndërtimin e shoqërisë civile në Kosovë, Zonja Gërvalla tha se LDK-ja është kthyer. Komandoja jonë ka bërë inspicimin e zyrave dhe ka hyrë provizorisht në to. Edhe atje gati gjithçka është shkatërruar. Ajo çka na duhet tash për tash, nëvizoi ajo, është pjesëmarrja e kosovarëve në ndërtimin e strukturës civile. Pa neve nuk do të ketë sukses të implementimit. Ata të cilët nuk kanë rënë viktima gjatë vrasjeve nga trupat serbe, disponojnë me njohuri shumëvjeçare në organizimin e strukturave civile. LDK-ja, me ndihmën e mijëra ndihmësve, ka mirëmbajtur gati në çdo vend të Kosovës për gati një dekadë një shoqëri civile paralele. Ky potencial tani mund të shfrytëzohet. LDK-ja ka filluar që të bëhet pikë e parë për këshillëkërkuesit, nga ndihmat humanitare deri tek këshillimet praktike.

Duke folur për ndihmat më se të nevojshme nga jashtë, Zëdhënësja e LDK-së tha se Kosovës i nevojitet gjithçka dhe gjithkush për rindërtim. Në këtë kontekst, i lusim miqtë tanë gjermanë që të mos lëshojnë pe në gatishmërinë e tyre për të ndihmuar. Edhe pse mund të tingëllojë paradoksale, shtoi ajo, më duhet të them se, tani, në kohën e shëlbesës për popullin tim, furnizimi i njerëzve po bëhet më i kushtueshëm. Prandaj, nga qytetet çadra të kampeve, ndihmat duhet ti drejtojmë kah qytetet, fshatrat dhe oborret e të kthyerve. Kjo është më e vështirë, por për njerëzit në Kosovë është më dinjitoze.

Në mbyllje të prezentimit të qëndrimeve të LDK-së dhe të përshtypjeve të saj nga vizita e fundit në Kosovë, Zëdhënësja e Degës së LDK-së në Gjermani, Zonja Donika Gërvalla tha: Pakti i stabilitetit për Ballkanin është një iniciativë e mirë. Shkaktari i fundit i kësaj konference, njerëzit e Kosovës të shpëtuar nga gjenocidi, nuk guxojnë të përjashtohen nga një konferencë e tillë. Këtu paraqesim kërkesën që me përfaqësuesit e jetës sonë civile të mundet të bashkëkëshillohet e edhe të bashkëvendoset. Në Ballkan, që nga Kongresi i Berlinit më 1878, është intervenuar shpesh në mënyrë tragjike. Kësaj here, pas këtij intervenimi humanitar, mund të hapet një kapitull i ri i politikës evropiane ndaj Ballkanit.Të gjithë ne duhet duhej të besojmë se, kësaj here, kjo do të arrihet.

Pastaj, Zonja Donika Gërvalla, Zëdhënëse e Degës së LDK-së në Gjermani, u përgjegj në pyetjet e shumta të gazetarëve të pranishëm në këtë konferencë.

Kthehem prapa | Në faqen e parë | Në krye të faqes | Ecë para

web hosting • domain names
web design • online games