Aktualizuar më:

Nga mbledhja e sektorit për informim të LDK-së
Prishtinë, 8 tetor (QIK) - Realizimi në fush‰n e informimit i objektivave të Këshillit të Përgjithshëm të LDK-së në kuadër të kuvendeve të punës të LDK-së, të cilat po mbahen në Kosovë, ishte temë qendrore e takimit të sotëm të kryetarëve të Komisioneve për Informim të Degëve të LDK-së, të cilën e drejtoi Milazim Krasniqi, sekretar i Sektorit për Informim të KP të LDK-së. Në fillim të fjalës së tij, z. Krasniqi tha se LDK-ja ka hyrë në procesin e verifikimit të politikës së saj të pavarësisë së Kosovës për të cilën ka merita të jashtëzakonshme. Ai shtoi se LDK-ja edhe në të ardhmen do të jetë e vendosur që të vazhdojë procesin e pavarësisë së Kosovës, ngase, siç tha ai, kjo është detyrë e të gjitha strukturave që të avancojnë politikën e pavarësisë së Kosovës. Në këtë takim po ashtu u theksua se edhe procesi i transformimit të LDK-së që të dëshmojë potencialin dhe fuqinë e LDK-së edhe në rrethana të reja dhe se ky transformim, përkatësisht profilizim i kësaj partie ka për qëllim pikërisht forcimin e mëtejmë të identitetit të LDK-së. Përfaqësuesit e komisioneve për informim paraqitën në këtë takim aktivitetet që po zhvillohen në kuadër të degëve, sollën të dhëna konkrete për kuvendet e punës të cilat po dëshmohen si kuvende të konsolidimit faktik të LDK-së. Njëherësh edhe në këtë takim u shtrua nevoja për rregullimin e statusit të komisioneve për informim dhe që sa më parë të nxirret gazeta e përditshme si organ i LDK-së. Përfaqësuesit e komisioneve për informim të LDK-së paraqitën edhe disa raste të shëmtuara të cilat po bëhen mbi aktivistët e LDK-së në terren ndaj të cilëve po ushtrohet një presion dhe këto raste ditët e fundit janë bërë shqetësuese. Madje, ka edhe raste kurë veprimtarët e LDK-së po merren në pyetje nga disa persona të vetëquajtur të pushtetit në Kosovë. Po ashtu u theksua se Komisionet për Informim të LDK-së në frymën e objektivave të KP të LDK-së do të angazhohen në politikën e LDK-së për kthimin e të deportuarve shqiptarë që ende nuk janë kthyer në Kosovë dhe në përkujdesjen e familjeve të të rënëve për pavarësinë e Kosovës.