Aktualizuar më:

Dega e LDK-së në Istog mbajti Kuvendin e punës
Prishtinë, 8 tetor (QIK) - Në Istog u mbajt pardje Kuvendi i punës i Degës së LDK-së. Punimet e kuvendit i hapi dhe i udhëhoqi kryetari i Degës, Fadil Ferati, ndërsa përshëndetjet e Presidentit të Republikës së Kosovës dhe të LDK-së, Ibrahim Rugova delegaëve ua përcolli Faruk Spahia, anëtar i Kryesisë së LDK-së. Në Kuvend ishin të pranishëm edhe Isuf Sutaj e Haki Shatri, anëtarë të KP të LDK-së. Raportin e punës së degës së LDK-së për periudhën dhjetor 1997- tetor 1999 e paraqiti sekretari i degës, Hazbi Bajra. Në disktuime përkitazi me raportin e punës dhe aktivitetin e partisë morën pjesë: Vesel Boletini, Isa Bajra, Rifat Osmanaj, Gani Rugova, Shaban Manaj, Azem Sadiku, Ramë Kelmendi dhe Haki Maxherri. Ata shtruan si nevojë të ngutshme konsolidimin sa më të shpejtë të të gjitha strukturave të LDK-së. Ishin objekt diskutimi edhe bashkëpunimi me të gjitha subjektet politike shqiptare, bashkëpunimi me UNMIK-un dhe me institucionet tjera të protektoratit, si dhe përgatitjet për zgjedhjet e ardhshme të lira në Kosovë. Në punimet e këtij kuvendi u manifestua një gatishmëri e lartë për ruajtjen e frymës së tolerancës dhe për kontribut sa më të denjë të potencialit të LDK-së në procesin e ndërtimit e të rindërtimit të Kosovës. Delegatët e miratuan raportin e punës me plotësime dhe sugjerime konkrete. Po ashtu ata aprovuan plotësimin e Kryesisë me dy antarë të rinj: Ferat Hajzeraj e Ramadan Blakaj, kurse lista e delegatëve që do të përfaqësojnë këtë degë në Kuvendin e LDK-së që pritet të mabhet në Prishtinë u plotësua me Fadil Feratin. Në fjalën e tij Faruk Spahiu, anëtar i Kryesisë së LDK-së, theksoi se kjo parti do të jetë edhe më e organizuar dhe me aktivitetin e vet do të angazhohet rreth protektorimit të Kosovës, ndërtimti dhe rindërtimit e Republikës së Kosovës, si dhe organizimin e pushtetit lokal në fazën kalitmare, bashkë me subjektet tjera politike dhe administratorin po punon për formimin e një organi ekzekutiv në Kosovë. Z.Spahiu tha se LDK-ja ishte faktor shumë i rëndësishëm për çlirimin e Kosovës dhe angazhimi i saj ishte i gjithanshëm në të gjitha format e luftës. Në gjendjen pas luftës LDK-ja do të kërkojë gjithherë një bashkëpunim korrekt me subjektet e tjera politike në Kosovë, gjithnjë në favor të pavarsisë së Kosovës, si zgjidhje e vetme e drejtë afatgjate, tha veç tjerash z.Spahiu. Në Kuvend foli edhe Isuf Sutaj, anëtar i KP të LDK-së dhe i dëshiroi degës së LDK-së në Istog punë të mbarë në të ardhmen. Delegatët e Kuvendit shpallën anëtar nderi të Kryesisë Nazmi Muzliajn, i cili është vrarë më 19 korrik të vitit të kaluar në kufirin shqiptaro-shqiptar. Po kështu, Ibrahim Hasanaj nga Dubrava u shpall anëtar nderi i Kuvendit të Degës, për aktivitet dhe ndihmë financiare të përhershme, që nga themelimi i Degës së LDK-së në Istog.