Aktualizuar më:

U mbajt Kuvendi V i Degës së LDK-së në Suharekë

Prishtinë, 12 tetor (QIK) - Kuvendi V i Degës së LDK-së së Suharekës filloi me një minutë heshtje në shenjë nderimi të të gjithë të rënëve për lirinë e Kosovës. Pos anëtarëve të Kryesisë qendrorer të kësaj partie, z.Agim Krasniqi e znj. Sanije Aliu, ishin edhe mysafirët nga Prizreni, Opoja, Zhuri dhe anëtarë të partive e të asociacioneve të tjera komunale. Që në fillim të punimeve u konstatua pjesëmarrja e 78 delegatëve, prej 101 përfaqësuesve të këtij kuvendi, tre prej të cilëve ishin vrarë në luftë (Xhavit Sylaj, Avdyl Beqiraj e Hajdin Berisha) dhe dy ndodhen në burgjet serbe (Nazim Zenelaj e Musli Palushi). Pastaj Ukë Bytyçi, kryetar i degës së kësaj partie, që u udhëhoqi punën e kuvendit, në vazhdim lexoi telegramin e komandantit të Brigadës 123 të ZOP, z.Gëzim Hazrolli. Viktor Markaj në raportin e punës dyvjeçare, pos të tjerash tha se që nga ditët e para u angazhuan në UÇK, kryetari i Degës Ukë Bytyçi, anëtarët e kryesisë, Blerim Kuçi, Halil Morina, Sali Asllani dhe Sami Jupaj. Pjesa tjetër e degës mbeti për të kryer veprimtarinë e vet edhe më tej, por si punë primare e kishte grumbullimin e ndihmave për nevoja të UÇK-së, si në aspektin financiar, e po ashtu edhe në ushqime e veshmbathje. Kështu, aktivistët e Degës së LDK-së në Suharekë, në shtabin lokal të UÇK-së, kanë dorëzuar mbi 600 mijë DM".

Në këtë luftë ranë heroikisht shumë aktivistë, kryetarë nëndegësh e anëtarë të kryesive, si: Xhavit Sylaj, kryetar i nëndegës në Sllapuzhan, Hajdin Berisha, anëtar i kryesisë së nëndegës Suhareka I dhe delegat i këtij kuvendi, Ruzhdi Çatani, anëtar i kryesisë në Duhël, Tahir Trolli-Çadrak, Xhemajli Tafa, Avdyl Beqiraj, Hazir Selimaj, anëtarë të kryesisë të nëndegës së Grejkocit, Xhavit Basha - Vraniq, Man Sallauka, Budakovë, Refki Rexhaj, anëtar i kryesisë në Terne, Ismail Bytyçi - Suharekë e shumë veprimtarë të tjerë dhe anëtarë të LDK-së nga kjo komunë.

U mbajt Kuvendi i punës i Degës së LDK-së në Kaçanik

Prishtinë, 12 tetor (QIK) - Në Shtëpinë e Kulturës në Kaçanik, të dielën, është mbajtur Kuvendi i punës i Degës së LDK-së.

Fillimisht, me një minutë heshtje të pranishmit në këtë kuvend kanë nderuar të vrarët nga forcat paramilitare dhe militare serbe gjatë luftës në Kosovë.

"LDK-ja ka bërë përpjekje maksimale për krijimin e një atmosfere bashkëpunimi vëllazëror ndërmjet grupimeve të ndryshme politike, stafit udhëheqës të UÇK-së dhe Këshillit komunal, mirëpo në të shumtën e rasteve nuk ka hasur në mirëkuptim. Nuk është arritur të jemi bashkë, madje as në manifestimet e organizuara në shënim të datave historike, sikundër ishte rasti me shënimin e 7 Shtatorit. Si pasojë e raporteve të tilla, dega jonë e LDK-së edhe sot vazhdon të zhvillojë aktivitetin e vet në zyrën që gjendet në një shtëpi private, e që nuk i plotëson as kushtet minimale për veprimtari normale", thuhet, ndër të tjera, në raportin e punës dyvjeçare të Degës së LDK-së në Kaçanik, të cilin e ka lexuar Izahir Doda, nënkryetar i Kryesisë së kësaj dege, ndësa është miratuar pa asnjë votë kundër.

Në pjesën zgjedhore të punimeve të këtij kuvendi, Muzafer Luma, Fehmi Krasniqi Sahit Bela dhe Sevdije Shehu me vota të hapura u zgjodhën anëtarë të Kryesisë të Degës së LDK-së në Kaçanik. Për më vonë u la të zgjedhen edhe dy anëtarë të tjerë.

Vendet e zbrazëta në Kryesinë e Degës së LDK-së në Kaçanik ishin krijuar si pasojë e vrasjës së katër antëtarëve të kësaj kryesie nga forcat serbe gjatë luftës (Qamil Ilazi, Rexhat Shehu, Avdylgafur Luma dhe Cen Loku), njëri anëtar më herët kishte dhënë dorëheqje nga kryesia dhe e kishte braktisur LDK-në (Xhelal Gashi, aktualisht kryetar i Këshillit komunal të Kaçanikut), kurse një anëtare është shkarkuar nga kryesia për mosaktivitet (Imrane Bela).

Delegatët kanë zgjedhur Luan Matlumën, delegat në Kuvendin qendror të LDK-së, në vend të Berat Luzhës.

Pas përfundimit të punimeve të këtij kuvendi, të pranishmit u kanë bërë homazhe të rënëve për liri në varrezat e dëshmorëve në Kaçanik.